Հայաստանի Պատմության Թանգարան

Պատմության թանգարանը հիմնադրվել է 1919թ-ին, և ի սկզբանե կոչվել է Ազգագրական-մարդաբանական թանգարան-գրադարան: Այցելուների համար թանգարանը իր դռները առաջին անգամ բացել է 2 տարի անց։ Թանգարանը ներկայիս անունը ստացել է 2003թ.-ին։
Պատմության թանգարանը բաղկացած է ավելի քան 400 հազարից ավելի հնագիտական, ազգագրական, դրամագիտական, վավերագրական և այլ նմուշներից՝ արտացոլելով Հայաստանի մշակույթի և պատմության ամբողջական պատկերը՝ նախապատմական ժամանակներից (մեզանից մեկ միլիոն ութ հարյուր հազար տարի առաջ) մինչև մեր օրերը։
Հնագիտական հավաքածուն իր մեջ ներառում է տարածաշրջանի հուշարձաններից տարբեր տարիներին պեղված պալեոլիթյան, նեոլիթ – էնեոլիթյան, բրոնզեդարյան եվ վաղ երկաթի դարաշրջանների, Ուրարտուի, վաղ հայկական շրջանի, հելլենիստական, միջնադարյան ժամանակաշրջաններից առարկաներ։
Ազգագրական հավաքածուում կարելի է տեսնել պղնձագործության, զինագործության, փայտագործության, գործվածքի ինքնատիպ նմուշներ, ինչպես նաև ազգագրական-վավերագրական լուսանկարներ։ Դրամագիտական հավաքածուի բաժնում գտնվում են մետաղադրամների, թղթադրամների, նամականիշների, մեդալների հարուստ նմուշներ։
Վավերագրերի հավաքածուի մեջ ներառված է XVII – XXI դարերին վերաբերող փաստաթղթեր, լուսանկարներ, ճարտարապետական հուշարձանների և վիմագիր արձանագրությունների նեգատիվներ, դրոշներ, կնիքներ, հասարակական, քաղաքական, ռազմական գործիչների անձնական արխիվներ:
Թանգարանի մշտական ցուցադրությունը ներկայացնում է հայ ժողովրդի պատմությունն ու մշակույթը` քարի դարից սկսած մինչև մեր օրեր։ Սակայն այս պահին հասանելի են մշտական ցուցադրության՝ քարի դարից մինչև միջնադարն ընկած ժամանակահատվածը ներկայացնող ցուցասրահները։ Ցուցադրությունը կառուցված է ժամանակագրական հաջորդականությամբ և յուրաքանչյուր ցուցասրահ կրում է իր բովանդակությանը համապատասխանող խորագիր։ Դրանք են՝
  «Հնագույն մարդու հետքերով․ քարի դար»
  «Իրականության և առասպելների միջով․ բրոնզի դար»
  «Երկաթի դար»
  «Աստվածների թագավորությունը․ Ուրարտու/Բիայնիլի»
  «Ուժ և գեղեցկություն․ Անտիկ Հայաստան»
  «Քրիստոնյա Հայաստան»